ചക്ക പഴംപൊരി

പഴം പൊരി /ഏത്തക്ക അപ്പം ഒക്കെ നമ്മള്‍ പലപ്പോഴും ഉണ്ടാക്കി കഴിക്കാറുണ്ട്, നാല് മണി പലഹാരമായും മറ്റും, കുട്ടികള്‍ക്കും ഈ പലഹാരം ഇഷ്ടമാണ്.

മഴയും കാറ്റും വന്നു കര്‍ഷകരുടെ വാഴ കൃഷി നശിച്ചു. നാടന്‍ നേന്ത്രക്കായ കിട്ടാനില്ല ഇപ്പോള്‍ നാട്ടില്‍ . കോന്നി /തമിഴ് നാട് കുലകള്‍ വരുന്നുണ്ട്. അതിനു ഇപ്പോള്‍ വില കിലോയ്ക്ക് 
55-60 രൂപ .

പക്ഷെ നമ്മുടെ നാട്ടിന്‍പുറത്ത് ഇപ്പൊള്‍ വളരെ സുലഭമായ മറ്റൊരു പഴം ഉണ്ട് , ലോകത്തിലെ ഏറ്റവും വലിപ്പം കൂടിയ പഴ൦ , ചക്കപ്പഴം .നാട്ടില്‍ ഒരു നല്ല വരിക്ക ചക്കയ്ക്ക് ഏറിയാല്‍ 30 രൂപ, അത് അതിര്‍ത്തി കടന്നാല്‍ 500 രൂപ .
പോഷക മൂല്യവും ഔഷധ മൂല്യവും ഉള്ള ചക്കയ്ക്ക് നാട്ടില്‍ എല്ലാം അവഗണന തന്നെയാണ്.

നേന്ത്രക്കായയ്ക്ക് പകരം നമുക്ക് ചക്ക പഴം കൊണ്ട് പഴം പൊരി ഉണ്ടാക്കി നോക്കിയാലോ. ചക്ക പഴം പൊരി ഉണ്ടാക്കി നോക്കി , വളരെ രുചികരം, കുട്ടികള്‍ക്കും മുതിര്‍ന്നവര്‍ക്ക് എല്ലാം ഇത് ഏറെ ഇഷ്ടപ്പെടും തീര്‍ച്ച.

ചക്ക പഴംപൊരി

ചേരുവകള്‍
1. കുരുകളഞ്ഞ പഴുത്ത ചക്കച്ചുള
(രണ്ടായി കീറിയത് ) – 20 എണ്ണം
(വരിക്ക ചക്കയാണ് നല്ലത്)
2. മൈദാമാവ് – അരക്കപ്പ്
(മൈദാ അധികം ഉപയോഗിക്കുന്നത് ഹാനികരം
എന്ന് പലരും അഭിപ്രായപ്പെടുന്നു , അത് കൊണ്ട് ,
മൈദയ്ക്ക് പകരം കടല മാവോ ഗോതമ്പ് മാവോ ഉപയോഗിച്ചോളൂ)
3. വെള്ളം – ഒരു ഗ്ലാസ്
4. മഞ്ഞള്‍പ്പൊടി, ഉപ്പ് – ഒരു നുള്ള്
5. പഞ്ചസാര – 2 സ്പൂണ്‍
6. വെളിച്ചെണ്ണ – പൊരിക്കാന്‍ ആവശ്യത്തിന്

തയ്യാറാക്കുന്ന വിധം:
ഉപ്പ്, വെള്ളം, പഞ്ചസാര, മഞ്ഞള്‍പ്പൊടി എന്നിവ ചേര്‍ത്ത് മാവ് നന്നായി കലക്കുക. ഫ്രയിങ് പാനില്‍ വെളിച്ചെണ്ണ ഒഴിച്ച് ചൂടാകുമ്പോള്‍ ഓരോ കഷണം ചക്കച്ചുളയെടുത്ത് മാവില്‍ മുക്കി പൊരിച്ചെടുക്കുക.

കുറിപ്പ് :ഇതിന്റെ റെസിപ്പിയ്ക്ക് ഷീബ നെബീലിന്റെ
"മാപ്പിള രുചികള്‍" എന്ന പുസ്തകത്തോട് കടപ്പെട്ടിരിക്കുന്നു.